مآلِ گردشِ دوراں وہ کیا سمجھے وہ کیا جانے

سنے ہوں عمر بھر جس نے گل و بلبل کے افسانے

دکھائیں بندگیٔ عشق کا عالم جو دیوانے

حرم میں حشر برپا ہو لرز جائیں صنم خانے

مری کوتاہ فہمی میری گمنامی کا باعث ہے

جو میں دنیا کو پہچانوں تو دنیا مجھ کو پہچانے

رہِ عشقِ وفا میں جو طلب کی وہ بھی اک منزل

جہاں سے بے نیازانہ گزر جاتے ہیں دیوانے

ہوا جاتا ہے کم ذوقِ وفا دورِ ترقی میں

کہ اب جلتے نہیں بے ہوش ہو جاتے ہیں پروانے

محبت آرزو ، سعیٔ مسلسل ، ذوقِ محرومی

متاعِ زندگی ہیں بس یہی دو چار افسانے