حمد نعت غزل نظم قطعات ترانے مناجات بزم مزاح گیت ادب اطفال رباعی آزاد نظم

فہرست ردیف

منتخب کلام کی ردیف کے آخری حرف کی ترتیب پر فہرست

اے دلا ہم ہوئے پابندِ غمِ یار کہ تو

غزل| قلندر بخش جرأتؔ انتخاب| بزم سخن

اے دلا ہم ہوئے پابندِ غمِ یار کہ تو

اب اذیت میں بھلا ہم ہیں گرفتار کہ تو

ہم تو کہتے تھے نہ عاشق ہو اب اتنا تو بتا

جا کے ہم روتے ہیں پہروں پسِ دیوار کہ تو

ہاتھ کیوں عشقِ بتاں سے نہ اٹھایا تو نے

کفِ افسوس ہم اب ملتے ہیں ہر بار کہ تو

وہی محفل ہے وہی لوگ وہی ہے چرچا

اب بھلا بیٹھے ہیں ہم شکلِ گنہ گار کہ تو

ہم تو کہتے تھے کہ لب سے نہ لگا ساغرِ عشق

مئے اندوہ سے اب ہم ہوئے سرشار کہ تو

بے جگہ جی کا پھنسانا تجھے کیا تھا درکار

طعن و تشنیع کے اب ہم ہیں سزا وار کہ تو

وحشتِ عشق بری ہوتی ہے دیکھا ناداں

ہم چلے دشت کو اب چھوڑ کے گھر بار کہ تو

آتشِ عشق کو سینے میں عبث بھڑکایا

اب بھلا کھینچوں ہوں میں آہِ شرر بار کہ تو

ہم تو کہتے تھے نہ ہم راہ کسی کے لگ چل

اب بھلا ہم ہوئے رسوا سرِ بازار کہ تو

غور کیجے تو یہ مشکل ہے زمیں اے جرأتؔ

دیکھیں ہم اس میں کہیں اور بھی اشعار کہ تو

پچھلا کلام | اگلا کلام

شاعر کا مزید کلام

اے دلا ہم ہوئے پابندِ غمِ یار کہ تو