قلب میں شمعِ محبت کو جلائے رکھنا

رونقِ محفلِ جاناں کو بڑھائے رکھنا

اپنے اشکوں کو اندھیرے میں چھپائے رکھنا

سرِ مژگاں نہ چراغوں کو جلائے رکھنا

حوصلے اپنے مصائب میں بڑھائے رکھنا

شمع کو تند ہواوؤں میں جلائے رکھنا

لذتِ آبلہ پائی سے ہوں محروم ہنوز

تم مری راہ میں کانٹوں کو بچھائے رکھنا

رہروِ عشق کو منزل کا پتہ دے گی ضرور

مشعلِ داغِ محبت کو جلائے رکھنا

صاف آ جائے نظر یار کی تصویر اس میں

گرد سے آئینۂ دل کو بچائے رکھنا

دولتِ عشق ہر ایک کو نہیں ملتی کوثرؔ

اس کو لوگوں کی نگاہوں سے بچائے رکھنا