رہنے دو چپ مجھے نہ سنو ماجرائے دل

میں حالِ دل کہوں تو ابھی منہ کو آئے دل

سمجھے گا کون کس سے کہوں راز ہائے دل

دل ہی سے کہہ رہا ہوں میں سب ماجرائے دل

کب تک یہ ہائے ہائے جگر ہائے ہائے دل

کر رحم ائے خدائے جگر ائے خدائے دل

دو لفظوں ہی میں کہہ دیا سب ماجرائے دل

خاموش ہو گیا ہے کوئی کہہ کے ہائے دل

آتے نہیں ہیں سننے میں اب نالہائے دل

سنسان کیوں پڑی ہے یہ ماتم سرائے دل

ہوتا ہوں محوِ لذتِ دید فضائے دل

باغ و بہارِ زیست ہیں یہ داغ ہائے دل

اب ہو چکی ہے جزم سے زائد سزائے دل

جانے دو بس معاف بھی کر دو خطائے دل

ہر ہر ادا بتوں کی ہے قاتل برائے دل

آخر کوئی بچائے تو کیوں کر بچائے دل

اتنا بھی کوئی ہوگا نہ صبر آزمائے دل

سب سے لگائے تم سے نہ کوئی لگائے دل

اک سیلِ نے پناہ ہے ہر اقتضائے دل

ایسا بھی ہائے کوئی نہ پائے جو پائے دل

مجذوبؔ تو بھی غیرِ خدا سے لگائے دل

عشقِ بتاں ہے بندۂ حق نا سزائے دل