حقیقت میں تو مۓ خانہ جب ہی مۓ خانہ ہوتا ہے

ترے دستِ کرم میں جب کبھی پیمانہ ہوتا ہے

نیا توبہ شکن جب داخلِ مۓ خانہ ہوتا ہے

نہ پوچھو پھر جو رنگِ محفلِ رندانہ ہوتا ہے

بظاہر دیکھنے میں ہوتی ہے سج دھج فقیرانہ

دماغ اُن کے گداؤں کا مگر شاہانہ ہوتا ہے

اِدھر لڑتی ہیں نظریں دل اُدھر آپس میں ملتے ہیں

حسینوں سے عجب انداز پر یارانہ ہوتا ہے

بہار آئی بڑھا سودا خزاں آئی بڑھی وحشت

جو ہوتا ہے یہ پاسِ خاطرِ دیوانہ ہوتا ہے

قیامت ہے ترے مجذوؔب کا مجنون ہو جانا

وہ جب دیوانہ ہوتا ہے غضب دیوانہ ہوتا ہے