یکایک کھل گئیں آنکھیں جو بزمِ یار میں آئے

اُٹھے پردے ہٹیں تاریکیاں انوار میں آئے

غزل خواں شادماں رقصاں گہے گریاں گہے خنداں

عجب انداز سے ہم کوچۂ دل دار میں آئے

مقامِ وجد ہے ائے دل مگر جائے ادب بھی ہے

بڑے دربار میں پہونچے بڑی سرکار میں آئے

اِدھر ہیں رند مستی میں اُدھر ہیں وجد میں صوفی

مزے ہر رنگ والے کو مرے اشعار میں آئے

چھڑا کر جان اپنی بے طرح مجذوبؔ بھاگا ہے

خدا ہی ہے جو اب وہ لوٹ کے گھر بار میں آئے