اگر مرتے ہوئے لب پر نہ تیرا نام آئے گا

تو میں مرنے سے درگزرا مرے کس کام آئے گا

شبِ ہجراں کی سختی ہو تو ہو لیکن یہ کیا کم ہے

کہ لب پر رات بھر رہ رہ کے تیرا نام آئے گا

کہاں سے لاؤں صبرِ حضرتِ ایوب ائے ساقی!

خُم آئے گا صراحی آئے گی تب جام آئے گا

اسی امید میں باندھے ہوئے ہیں ٹکٹکی مے کش

کفِ نازک پہ ساقی رکھ کے اک دن جام آئے گا

یہاں دل پر بنی ہے تجھ سے ائے غم خوار کیا الجھوں

یہ کون آرام ہے مر جاؤں تب آرام آئے گا

انہیں دیکھے گی تو اے چشمِ پرنم وصل میں یا میں

ترے کام آئے گا رونا کہ میرے کام آئے گا

یہی کہہ کر اجل کو قرض خواہوں کی طرح ٹالا

کہ لے کر آج قاصد یار کا پیغام آئے گا

گلی میں یار کی ائے شادؔ سب مشتاق بیٹھے ہیں

خدا جانے وہاں سے حکم کس کے نام آئے گا