اک ایک ستم اور لاکھ ادائیں اُف رے جوانی ہائے زمانے

ترچھی نگاہیں تنگ قبائیں اُف رے جوانی ہائے زمانے

ہجر میں اپنا اور ہی عالم ابرِ بہاراں دیدۂ پُرنم

ضد کہ ہمیں وہ آپ بلائیں اُف رے جوانی ہائے زمانے

کالی گھٹائیں باغ میں جھولے دھانی دوپٹّے لٹ جھٹکائے

مجھ پہ یہ قدغن آپ نہ آئیں اُف رے جوانی ہائے زمانے

اپنی ہوا سے آپ جھجکنا اپنی ادا سے آپ کھٹکنا

چال پہ لغزش منہ پہ حیائیں اُف رے جوانی ہائے زمانے

ہاتھ میں آڑی تیغ پکڑنا تا کہ لگے بھی زخم تو اوچھا

قصد کہ پھر جی بھر کے ستائیں اُف رے جوانی ہائے زمانے

پچھلے پہر اٹھ اٹھ کے نمازیں ناک رگڑنی سجدوں پہ سجدے

جو نہیں جائز اس کی دعائیں اُف رے جوانی ہائے زمانے

شادؔ نہ وہ دیدار پرستی اور نہ وہ بے نشہ کی مستی

تجھ کو کہاں سے ڈھونڈ کے لائیں اُف رے جوانی ہائے زمانے