منزلوں سے بیگانہ آج بھی سفر میرا

رات بےسحر میری درد بے اثر میرا

گمرہی کا عالم ہے کس کو ہم سفر کہیئے

تھک کے چھوڑ بیٹھی ہے ساتھ رہگزر میرا

وہ فروغِ خلوت بھی انجمن سراپا بھی

بھر گیا ہے پھولوں سے دامنِ نظر میرا

اب ترے تغافل سے اور کیا طلب کیجئے

شوقِ نارسا میرا عشقِ معتبر میرا

دورِ کم عیاری ہے کچھ پتا نہیں چلتا

کون میرا قاتل ہے کون چارہ گر میرا

ناگزیرِ ہستی ہیں فصل و گل کے ہنگامے

شورشِ نمو تیری فتنۂ شرر میرا

کچھ بتاؤ تو آخر کیا جواب دوں اس کو

اک سوال کرتا ہے روز مجھ سے گھر میرا

آسماں کا شکوہ کیا وقت کی شکایت کیوں

خونِ دل سے نکھرا ہے اور بھی ہنر میرا

دل کی بے قراری نے ہوش کھو دئے تاباؔں

ورنہ آستانوں پر کب جھکا تھا سر میرا