حمدنعتغزلنظمقطعاتترانےمناجاتبزم مزاحگیتادب اطفالرباعیآزاد نظم
فہرست ردیف
منتخب کلام کی ردیف کے آخری حرف کی ترتیب پر فہرست

ائے سرورِ دوکون شہنشاہِ ذو الکرم

نعت| بہادر شاہ ظفرؔ انتخاب| بزم سخن

ائے سرورِ دوکون شہنشاہِ ذو الکرم
سرخیلِ مرسلین و شفاعت گرِ اُمم
موکب ترا ملائک و مرکب ترا براق
مولا ہے ترا مکہ و معبد ترا حرم
رنگِ ظہور سے تیرے گلشن رخِ حدوث
نورِ وجود سے تیرے روشن دلِ قدم
ہوتا کبھی نہ قالبِ آدم میں نفخِ روح
بھرتا اگر خدا نہ محبت کا تیری دم
ٹوٹا جو کفر قوتِ اسلام سے ترے
صد جائے سے شکستہ ہے زنّارِ موجِ یم
تو تھا سریرِ اوجِ رسالت پہ جلوہ گر
آدم جہاں ہنوز پسِ پردۂ عدم
کرتا تھا تیرے اسمِ مبارک کو دل پہ نقش
اس واسطے عزیزِ جہاں ہو گیا ورم
اے معدنِ کرم تری ہمت کے روبرو
کمتر ہے سنگ ریزہ سے قدرِ نگینِ جم
جو کچھ سوائے عرش وہ سب اسکے سایہ میں
تیرے ہوا ہے جاہ کا برپا جہان علم
محروم تیرے دستِ مبارک سے رہ گیا
کیوں کر نہ چاک اپنا گریباں کرے قلم
عالم کو تیرا نور ہوا باعثِ ظہور!
آدم ترے ظہور سے ہے مظہرِ اتم
ہیں زائرانِ روضۂ اقدس ترے جہاں
آتا ہے پائے بوس کو واں روضۂ ارم
واللّیل تیرے گیسوئے مشکیں کی ہے ثنا
والشّمس ہے ترے رخِ پُر نور کی قسم
قرآں میں جب کہ خود ہو ثنا خواں ترا خدا
کیا تاب پھر قلم کی جو کچھ کر سکے رقم
صیقل سے اپنے لطف و عنایت کے دور کر
آئینۂ ضمیر سے میرے غبارِ غم
پہنچا نہ آستانِ مقدس کو تیرے میں
اس غم سے مثلِ چشمہ ہوئی میری چشمِ نم
پر خاک آستاں کو تری اپنی چشم میں!
کرتا ہوں سرمہ سیلِ تصور سے دم بدم
تیری جنابِ پاک میں ہے یہ ظفرؔ کی عرض
صدقے میں تیری آل کے ائے شاہِ محتشم

پچھلا کلام | اگلا کلام

شاعر کا مزید کلام