گیسو ہیں ترے بکھرے یوں شام ہوئی جیسے

ہرسمت اندھیرا ہے بدلی ہو گھری جیسے

یہ عمر جدائی کی اس طرح گذرتی ہے

اب رات ڈھلی جیسے بس صبح ہوئی جیسے

اُجڑے ہوئے دل میں یوں پھر یاد تری آئی

ویران سے مندر میں اک شمع جلی جیسے

اک عمر سے کھویا ہوں یوں تیرے خیالوں میں

خوابوں کے جزیرے میں کھو جائے کوئی جیسے

موجیں مئے رنگیں کی شیشے میں مچلتی ہیں

ہو رقص کے عالم میں ساغر میں پری جیسے

ہنستا ہوں تو آنکھوں سے آنسو چھلک آتے ہیں

انجامِ محبت پر روتی ہے خوشی جیسے

کیا کہیئے پیامؔ اپنی الفت کا سفر کیا ہے

انجان مسافر ہو اور منزل نئی جیسے