اس جُدائی نے طلب تیری بڑھا دی کچھ اور

شعلۂ عشق کو اشکوں نے ہوا دی کچھ اور

قیدِ ہستی سے رہائی کی تمنا کی تھی

زندگی نے مجھے جینے کی سزا دی کچھ اور

اس اندھیرے میں لہو دل کا بڑا کام آیا

روشنی میں نے چراغوں کی بڑھا دی کچھ اور

جب بھی وقت آیا کوئی جان پہ ہم کھیل گئے

آبرو عشق کی یوں ہم نے بڑھا دی کچھ اور

اور جینے کے لئے مجھ کو دعائیں دے کر

تم نے اس قید کی میعاد بڑھا دی کچھ اور

جانے کیا رشتہ مرے دل کا تھا قاتل سے پیامؔ

جب کوئی زخم لگا دل نے دعا دی کچھ اور