نہ نشاطِ چارہ سازی نہ ملالِ کم نگاہی

مجھے اس نظر نے مارا بہ گناہِ بے گناہی

سرِ انجمن غنیمت ہے بتوں کی کم نگاہی

کہ سکونِ دل پہ آتی ہے نظر سے بھی تباہی

یہ سیاستِ بہاراں ہے خزاں کی بے پناہی

کہ جو جل اٹھے نشیمن تو چمن نہ دے گواہی

تری انجمن سے باہر کئی آفتاب نکلے

نہ دھلی کسی سحر سے کسی رات کی سیاہی

دئے تیری رہ گزاروں کے جہاں جہاں جلے ہیں

کوئی شمعِ بت کدہ ہے نہ چراغِ خانقاہی

ترے شہر سے نکلتے ہی مزاجِ دہر بدلا

نہ وہ ربطِ شبنم و گل نہ وہ بادِ صبح گاہی

نہ صنم کدے کی منزل نہ حرم کا آستانہ

وہ نظر جہاں اٹھی ہے وہیں رک گئے ہیں راہی

ترے شہرِ آرزو میں یوں ہی کٹ گئی ہیں راتیں

نہ جنوں کی آنکھ جھپکی نہ خرد نے لی جماہی

کوئی شورؔ یہ تو پوچھے در و بامِ خسروی سے

یہ لہو سے کس کے روشن ہے چراغِ کج کلاہی