حوصلہ باقی رہے آنکھوں میں دم باقی رہے

انگلیاں کٹ جائیں ہاتھوں میں قلم باقی رہے

قبل از منزل رسی سب ہم سفر اب آ ملیں

اس لئے سوچا ہوں منزل دو قدم باقی رہے

کہہ دیا تم نے رہِ اسلاف کو کیوں خیر باد!

کیسے ممکن ہے کہ پھر جاہ و حشم باقی رہے

جب بھی ہو خالی صراحی کی نظر ہو جام پر

اس طرح ساقی ترا لطف و کرم باقی رہے

ذہن و دل پر كيف کا غلبہ کوئی بھی کیوں نہ ہو

پر دماغ و دل میں استحضارِ غم باقی رہے

شعر پر داد و دہش میں جز رسی اچھی نہیں

شاعرِ بلگام کا کچھ تو بهرم باقی رہے

چھوڑ جاتا ہوں عزیزؔ اپنا کلامِ دل نشیں

نسلِ نو کے واسطے نقشِ قدم باقی رہے