دعوت و ہدایت کی اک حسیں شفق لے کرمیرے مصطفی آئے میرے مصطفی آئے

کفر کے اندھیروں میں نور کا طبق لے کر میرے مصطفی آئے میرے مصطفی آئے

کفرتھا ضلالت تھی مالک حقیقی سے ہر طرف بغاوت تھی ہر طرف بغاوت تھی

بولہب کی بستی میں پیار کا سبق لےکر میرے مصطفی آئے میرے مصطفی آئے

سرکشی کی آتش تھی دین ہائے باطل کی ظلمتوں کا غلبہ تھا ظلمتوں کا غلبہ تھا

زندگی اندھیری تھی شمعِ دینِ حق لے کر میرے مصطفی آئے میرے مصطفی آئے

ہٹ دھرم زمانے کو دعوتِ رسالت سے اطمینان کیا ہوتا اطمینان کیا ہوتا

معجزہ ضروری تھا ماہتابِ شق لے کر میرے مصطفی آئے میرے مصطفی آئے

فتنہ جُو زمانہ تھا دین کی اشاعت میں حکمتیں ضروری تھیں حکمتیں ضروری تھیں

حاسدوں کی دنیا میں سورۃ الفلق لے کر میرے مصطفی آئے میرے مصطفی آئے

ٹھیک ہے عقیدت ہو ساتھ ہی عقیدت کے جذبۂ اطاعت ہو جذبۂ اطاعت ہو

جو عمل کے قابل ہوایسا اک سبق لے کرمیرے مصطفی آئے میرے مصطفی آئے

عالمِ رسالت میں آئینِ رسالت کی جو کتاب ادھوری تھی جو کتاب ادھوری تھی

اس کتابِ رحمت کا آخری ورق لے کر میرے مصطفی آئے میرے مصطفی آئے