بربریت سے ہمیں دو چار ہونا تھا ، ہوئے

اتنے بے کس اس قدر لاچار ہونا تھا ، ہوئے

بھر گیا دامن ہمارا زیست کی خیرات سے

موت کے در پر ذلیل و خوار ہونا تھا ، ہوئے

مے کدہ کیسا ، کہاں کا جام ، کیسی مے جناب!

تشنگی ہی سے ہمیں بیزار ہونا تھا ، ہوئے

چپ اگر تھے تو خموشی کا تقاضہ تھا یہی

جب امین جرأت اظہار ہونا تھا ، ہوئے

پھر قفس کا در کھلا ہے حق پرستوں کے لئے

کیوں کہ ان کو صاحب کردار ہونا تھا ، ہوئے

چیختے ہیں معرکے کردار کی خاطرعزیزؔ

اور ہم کو غازیٔ گفتار ہونا تھا ، ہوئے