ازل کے رازِ سربستہ کئے میں نے نہاں اب تک

بشر ہو کر فرشتوں کا رہا ہوں رازداں اب تک

مری فطرت وفا ہے دے رہا ہوں امتحاں اب تک

وہ ظالم بے وفا لیکن ہے مجھ سے بد گماں اب تک

خزاں گلشن پہ یوں منڈلا رہی ہے باغباں اب تک

کہ زد میں ہر بلا کی ہے ہمارا آشیاں اب تک

زمانہ ہو گیا بجلی گری تھی جب گلستاں پر

مگر اُٹھتا ہے میرے آشیانے سے دھواں اب تک

فضا بدلی ہوئی دیکھی تھی ہم نے ایسی گلشن کی

نظر ہے مطمئن اب تک نہ دل ہے شادماں اب تک

چمن ویراں فضا برباد نظمِ آشیاں برہم

ہمیں غم دے رہا ہے انقلابِ گلستاں اب تک

خلافِ وقت اپنا قافلہ منزل پہ پہونچے گا

کہ محوِ خوابِ شیریں ہے امیرِ کارواں اب تک

خوشی آزاد ہونے کی نہ آئی راس ائے انورؔ

پریشاں بلبلیں ہیں نوحہ خواں ہے باغباں اب تک