شکوہ کیا جفا کا تو نم دیدہ ہوگئے

شکوہ کیا جفا کا تو نم دیدہ ہو گئے

تم تو ذرا سی بات پہ رنجیدہ ہو گئے

اللہ رے! تمہارے تبسم کی شوخیاں

زخمِ جگر بھی دیکھ کے خندیدہ ہو گئے

کھینچی جو دستِ شوق نے ان کی نقابِ رخ

جلوے فرازِ بام پہ رقصیدہ ہو گئے

بچپن کی شوخیوں سے تو وہ بے خبر رہے

آیا شباب اُن پہ تو فہمیدہ ہو گئے

کچھ اس طرح سے کوندی نشیمن پہ بجلیاں

اہلِ چمن بھی دیکھ کے لغزیدہ ہو گئے

نکلا جو میں وفورِ جنوں میں دیار سے

رستے حریمِ حسن کے پیچیدہ ہو گئے

تابِ نظارہ لا نہ سکی جب میری نظر

جلوے کسی کے حسن کے پوشیدہ ہو گئے

دامِ بلا میں پھنس کے جو تڑپا ہمارا دل

زلفوں کے جال اور بھی پیچیدہ ہو گئے

انورؔ حواس و ہوش سے بیگانہ تھے مگر

آئے جو میکدے میں تو سنجیدہ ہو گئے