جب فصلِ بہاراں آتی ہے شاداب گلستاں ہوتے ہیں

تکمیلِ جنوں بھی ہوتی ہے اور چاک گریباں ہوتے ہیں

پرکیف فضائیں چلتی ہیں مخمور گھٹائیں چھاتی ہیں

جب صحنِ چمن میں جلوہ نما وہ جانِ بہاراں ہوتے ہیں

ہوتا ہے سکونِ قلب و جگر ہر زخم میں لذت آتی ہے

او ناوَکِ افگن تیر ترے تسکینِ رگِ جاں ہوتے ہیں

کیوں منّتِ چارہ گر کیجئے کیوں فکرِ دوائے دل کیجئے

بیمارِ محبت کے نالے خود درد کا درماں ہوتے ہیں

یہ عہدِ جوانی شوخیٔ گل دو دن کی بہاریں ہوتی ہیں

دیکھیں تو کبھی وہ رنگِ خزاں جو حسن پہ نازاں ہوتے ہیں

جب بادِ بہاری آتی ہے ہر گل پہ جوانی چھاتی ہے

کُھل جاتے ہیں میرے زخمِ جگر اور داغ درخشاں ہوتے ہیں

گرادب محافظ ہوتا ہے ائے بحرِ حوادث بے کس کا

کِھنچ آتا ہے ساحل موجوں میں جب جوش پہ طوفاں ہوتے ہیں

کیا مجھ کو ضرورت ائے انورؔ کیوں ان کے ستم کا شاکی ہوں

جب یاد جفائیں آتی ہیں وہ خود ہی پشیماں ہوتے ہیں