رخشندہ ترے حسن سے رخسارِ یقیں ہے

تابندہ ترے عشق سے ایماں کی جبیں ہے

چمکا ہے تری ذات سے انساں کا مقدر

تو خاتمِ دوراں کا درخشندہ نگیں ہے

ہر قول ترا حرفِ صداقت کا ہے ضامن

ہر فعل ترا حسنِ ارادت کا امیں ہے

ہر گام ترا ہم قدمِ گردشِ دوراں

ہر جادہ تری رہ گذرِ خلد بریں ہے

جس میں ہو ترا ذکر وہی بزم ہے رنگیں

جس میں ہو ترا نام وہی بات حسیں ہے

چمکی تھی کبھی جو ترے نقشِ کفِ پا سے

اب تک وہ زمیں چاند ستاروں کی زمیں ہے

جھکتا ہے تکبر تیری دہلیز پہ آ کر

ہر شاہ تری راہ میں اک خاک نشیں ہے

آنکھوں میں ہے اس خلقِ مجسم کا تصور

اک خلدِ مسرت مری نظروں کے قریں ہے

آیا ہے ترا نامِ مبارک مرے لب پر

گرچہ یہ زباں اس کی سزاوار نہیں ہے