منزل کوئی نہ جادۂ منزل نظر میں ہے

لیکن حیات ہے کہ مسلسل سفر میں ہے

عمریں گزر گئیں ہے اندھیرے میں گامزن

اک آرزو مری کہ تلاشِ سحر میں ہے

وہ اک تڑپ کہ جس سے عبارت ہے زندگی

کچھ سنگِ در میں کچھ مرے سودائے سر میں ہے

اے کاش! میری وسعتِ دل میں سما سکے

جو داستاں تری نگۂ مختصر میں ہے

اک بار ساتھ چل کے ہوئی پھر جدا نہ یہ

میں بھی سفر میں یاد بھی تیری سفر میں ہے

جچتے نہیں بہشت کے منظر نگاہ میں

جس دن سے اک بہشتِ خراماں نظر میں ہے

اے گل! مہک رہی ہے مری فکر آج تک

شاید تری شمیم مسلسل سفر میں ہے

اے با خبر شعور تجھے علم بھی کہاں

معنی کا اک جہان دلِ بے خبر میں ہے

تابندہ ہوگئی ہے گزر گاہِ زندگی

آزادؔ ! جب سے منزل جاناں نظر میں ہے