ہوگئے رخصت یہاں سے ہائے کیا کیا آشنا

اب کہاں اس شہر میں کوئی ہمارا آشنا

ائے دلِ رفتہ نشاطِ عہدِ رفتہ کو نہ ڈھونڈ

یہ نئی دنیا ہے اس میں کون کس کا آشنا

زندگی بھر کا تعلق آ گیا کس موڑ پر

آشنا برسوں کا اک پل میں ہوا ناآشنا

اب کھلا اس باغ مِیں میں سبزۂ بیگانہ تھا

میں سمجھتا تھا کہ میں ہوں اس چمن کا آشنا

ساقیٔ میخانہ! تجھ سے تشنگی کی کیا کہوں

زندگی صحرا نورد و شوق دریا آشنا

یہ نہیں ہے آشنائی یہ نہیں بیگانگی

یا تو بیگانہ ہو انساں اور ہو یا آشنا

مصرعِ صائؔب پہ ہیں میرے دل و جاں وجد میں

فرق باشد جانِ از آشنا تا آشنا

ائے وطن اب کیا کہوں صحرائے اعظم کا سفر

آتی تھی نظروں میں میری ریگِ صحرا آشنا

کٹ گئی آزاؔد کس بیگانہ پن میں زندگی

کاش ہوتا شہر میں کوئی ہمارا آشنا