یہ رات بھیانک ہجر کی ہے کاٹیں گے بڑے آرام سے ہم

ٹلنے کی نہیں یہ کالی بلا سمجھے ہی ہوئے تھے شام سے ہم

تھا موت کا کھٹکا جاں فرسا صد شکر کہ نکلا وہ کانٹا

گر ہو نہ قیامت کا دھڑکا اب ہیں تو بڑے آرام سے ہم

اے ہم نفسو! دم لینے دو وہ بھولے نغمے یاد آ لیں

آئے ہیں چمن میں اُڑ کے ابھی چھوٹے ہیں اسی دم دام سے ہم

باتوں میں گزرتے ہجر کے دن اے کاش کہ دونوں مل جاتے

ہم سے ہے دلِ ناکام خفا آزردہ دلِ ناکام سے ہم

وہ سمجھے کہ میں نے مار لیا ہم سمجھے ملیں گے آخر وہ

ملتے ہی نگہ کے دونوں خوش آغاز سے وہ انجام سے ہم

دنیا میں تخلص کوئی نہ تھا کیا نیل کا ٹیکا شادؔ ہی تھا

تم وجہ نہ پوچھو کچھ اس کی چڑ جاتے ہیں کیوں اس نام سے ہم