نہ جاں بازوں کا مجمع تھا نہ مشتاقوں کا میلا تھا

خدا جانے کہاں مرتا تھا میں جب تو اکیلا تھا

گھروندا یوں کھڑا تو کر لیا ہے آرزوؤں کا

تماشا ہے جو وہ کہہ دیں کہ میں ایک کھیل کھیلا تھا

ہمیشہ حسرتِ دیدار پر دل نے قناعت کی

بڑے در کا مجاور تھا بڑے مرشد کا چیلا تھا

بہت سستے چُھٹے ہم جان دے کر مل گیا ساغر

یہ سودا وہ ہے جس میں کیا کہیں کیا کیا جھمیلا تھا

تماشا گاہِ دنیا میں بتاؤں کیا امیدوں کی

تنِ تنہا تھا میں ائے شادؔ اور ریلے پہ ریلا تھا