سلام ائے صبحِ کعبہ السلام ائے شامِ بت خانہ

تو چمکا بزمِ آزر میں بہ اندازِ خلیلانہ

حریمِ پاک تیرا وہ بلند ایواں حقیقت کا

جہاں جبریلؑ بھی ناچیز سا ہے ایک پروانہ

کہیں تو زندگی پیرا بہ اندازِ لبِ عیسیٰؑ

کہیں تو خطبہ فرما اوجِ طائف پر کلیمانہ

فراغِ آفرینش ہے تو ہے تیرے ہی جلوؤں سے

کہیں تو شمعِ محفل ہے کہیں تو نورِ کاشانہ

کچھ اس انداز سے جلوہ نمائی تو نے فرمائی

کہ ہر ذرہ زمیں کا ہوگیا تیرا ہی دیوانہ

یہ دنیا تیری نظروں میں مثالِ نقطۂ ناقص

یہ عالم خرمنِ عرفاں کا تیرے صرف اک دانہ

مجھے معلوم ہے رازِ غلامی اہلِ عالم کا

ہے آئینِ سیاست سے ترے ذہن ان کا بیگانہ

اگر پیرَو ترا یہ عالمِ ایجاد ہو جائے

تو اک انساں ہی کیا کل کائنات آزاد ہو جائے