نسیمِ صبح گلشن میں گلوں سے کھیلتی ہوگی

کسی کی آخری ہچکی کسی کی دل لگی ہوگی

تمہیں دانستہ محفل میں جو دیکھا ہو تو مجرم ہوں

نظر آخر نظر ہے بے ارادہ اٹھ گئی ہوگی

مزہ آئے گا محشر میں کچھ سننے سنانے کا

زباں ہوگی ہماری اور کہانی آپ کی ہوگی

سرِ محفل بتا دوں گا سرِ محشر دکھا دوں گا

ہمارے ساتھ تم ہوں گے یہ دنیا دیکھتی ہوگی

تعجب کیا لگی جو آگ ائے سیمابؔ سینے میں

ہزاروں دل میں انگارے بھرے تھے لگ گئی ہوگی