غم مجھے حسرت مجھے وحشت مجھے سودا مجھے

ایک دل دے کر خدا نے دے دیا کیا کیا مجھے

ہے حصولِ آرزو کا راز ترکِ آرزو

میں نے دنیا چھوڑ دی تو مل گئی دنیا مجھے

یہ نمازِ عشق ہے کیسا ادب کس کا ادب

اپنے پائے ناز پر کرنے بھی دے سجدہ مجھے

کہہ کے سویا ہوں یہ اپنے اضطرابِ شوق سے

جب وہ آئیں قبر پر فوراً جگا دینا مجھے

صبح تک کیا کیا تری امید نے طعنے دیے

آ گیا تھا شامِ غم اک نیند کا جھوکا مجھے

دیکھتے ہی دیکھتے دنیا سے میں اٹھ جاؤں گا

دیکھتی کی دیکھتی رہ جائے گی دنیا مجھے

جلوہ گر ہے اس میں اے سیمابؔ اک دنیائے حسن

جامِ جم سے ہے زیادہ دل کا آئینہ مجھے