کچھ اس طرح تڑپ کر میں بے قرار رویا

دشمن بھی چیخ اٹھا بے اختیار رویا

کیا اس کو بے قراری یاد آ گئی ہماری

مل مل کے بجلیوں سے ابرِ بہار رویا

آیا ہے بعدِ مدت بچھڑے ہوئے ملے ہیں

دل سے لپٹ لپٹ کر غم بار بار رویا

نازک ہے آج شاید حالت مریضِ غم کی

کیا چارہ گر نے سمجھا کیوں زار زار رویا

کچھ بھی ہو برق و باراں ہم تو یہ جانتے ہیں

اک بے قرار تڑپا اک دل فگار رویا

فانیؔ کو یا جنوں ہے یا تیری آرزو ہے

کل نام لے کے تیرا دیوانہ وار رویا