ہجر کی آنکھوں سے آنکھیں تو ملاتے جائیے

ہجو میں کرنا ہے کیا یہ تو بتاتے جائیے

بَن کے خوشبو کی اداسی رہیئے دل کے باغ میں

دور ہوتے جائیے نزدیک آتے جائیے

جاتے جاتے آپ اتنا کام تو کیجئے مرا

یاد کا سارا سر و ساماں جلاتے جائیے

رہ گئی امید تو برباد ہو جاؤں گا میں

جائیے تو پھر مجھے سچ مچ بھلاتے جائیے

زندگی کی انجمن کا بس یہی دستور ہے

بڑھ کے ملئیے اور مل کر دور ہوتے جائیے

آخری رشتہ تو ہم میں اک خوشی اک غم کا تھا

مسکراتے جائیے آنسو بہاتے جائیے

وہ گلی ہے اک شرابی چشمِ کافر کی گلی

اس گلی میں جائیے تو لڑکھڑاتے جائیے

آپ کو جب مجھ سے شکوہ ہی نہیں کوئی تو پھر

آگ ہی دل میں لگانی ہے لگاتے جائیے

کوچ ہے خوابوں سے تعبیروں کی سمتوں میں توپھر

جائیے پر دم بہ دم برباد ہوتے جائیے

آپ کا مہمان ہوں میں آپ میرے میزبان

سو مجھے زہرِ مروّت تو پلاتے جائیے

ہے سرِ شب اور مرے گھر میں نہیں کوئی چراغ

آگ تو اس گھر میں جانانہ لگاتے جائیے