ہم گذشتہ صحبتوں کو یاد کرتے جائیں گے

آنے والے دور بھی یونہی گذرتے جائیں گے

کچھ خدا کا بھی خیال اب دل میں کرتے جائیں گے

بت کدے جاتے ہیں کعبہ میں ٹہرتے جائیں گے

یہ تو سوچو دل ہی کیا ہے مجرمانِ عشق کا

سامنے جائیں گے لیکن ڈرتے ڈرتے جائیں گے

حسن ہو جس رنگ میں محتاجِ آرائش نہیں

وہ بگڑتے جائیں گے جتنا سنورتے جائیں گے

در پہ آئے ہیں تمہارے تم ملو گے یا نہیں

آج جھگڑے عمر بھر کے ختم کرتے جائیں گے

تم نقاب اُلٹو تو دیکھو دیکھنے والوں کا حال

رنگ اُڑتے جائیں گے چہرے اُترتے جائیں گے

دیدۂ تر بن کے ناسور آہ کہتے ہیں عزیزؔ

جس قدر دنیا دبائے گی ابھرتے جائیں گے