کھولیے چل کے غمِ دل کی دکاں اور کہیں

ماند پڑ جائیں نہ زخموں کے نشاں اور کہیں

ساتھ اس شہر کے صدیوں کی تن آسانی ہے

درسِ تحریک دے اے کارِ جہاں اور کہیں

وادیٔ سنگ میں پھر جشن کی تیاری ہے

کیا کوئی بن گیا شیشے کا مکاں اور کہیں

جسم و احساس تو بستے رہیں اس بستی میں

اور کہتے ہو میں کھولوں تو زباں اور کہیں

بند کمرے میں جلاتے رہو لفظوں کے چراغ

بات لے جائے نہ معنی کا دھواں اور کہیں

قیس و فرہاد تو ملتے رہے دنیا میں وسیمؔ

پیار کو مل نہ سکا شاہ جہاں اور کہیں