بے سہاروں کا انتظام کرو

یعنی اک اور قتلِ عام کرو

میں جفاوؤں کو بھول جاؤں گا

تم وفاوؤں کا احترام کرو

خیر خواہوں کا مشورہ یہ ہے

ٹھوکریں کھاؤ اور سلام کرو

دب کے رہنا ہمیں نہیں منظور

ظالمو! جاؤ اپنا کام کرو

خواہشیں جانے کس طرف لے جائیں

خواہشوں کو نہ بے لگام کرو

یہ ہنر بھی بڑا ضروری ہے

کتنا جھک کر کسے سلام کرو

بد دعا دے کے چل دیا وہ فقیر

کہہ دیا تھا کہ کوئی کام کرو

میزبانوں میں ہو جہاں اَن بَن

ایسی بستی میں مت قیام کرو

سانپ آپس میں کہہ رہے ہیں حفیظؔ

آستینوں کا انتظام کرو