ایسی آسانی سے قابو میں کہاں آتی ہے آگ

جب بھڑکتی ہے تو بھڑکے ہی چلی جاتی ہے آگ

خاک سرگرمی دِکھائے بے حسی کے شہر میں

برف کے ماحول میں رہ کر ٹھٹر جاتی ہے آگ

پاسباں آنکھیں ملے انگڑائی لے آواز دے

اتنے عرصے میں تو اپنا کام کر جاتی ہے آگ

آنسوؤں سے کیا بجھے گی دوستو دل کی لگی

اور بھی پانی کے چھینٹوں سے بھڑک جاتی ہے آگ

حل ہوئے ہیں مسئلے شبنم مزاجی سے مگر

گتھیاں ایسی بھی ہیں کچھ جن کو سلجھاتی ہے آگ

یہ بھی اک حساس دل رکھتی ہے پہلو میں ضرور

گدگداتا ہے کوئی جھونکا تو بل کھاتی ہے آگ

جب کوئی آغوش کھلتا ہی نہیں اس کے لئے

ڈھانپ کر منہ راکھ کے بستر میں سو جاتی ہے آگ

امن ہی کے دیوتاؤں کے اشارے پر حفیظؔ

جنگ کی دیوی کھلے شہروں پہ برساتی ہے آگ