دروازے سے مت لوٹ آؤ لوٹ آ کر پچھتاؤ گے

تنہائی سے خوف لگے گا خود سے بھی گھبراؤ گے

خوش فہمی کے شیش محل کو ایک دن ٹوٹ ہی جانا تھا

اب بھی جو تم نہ سمجھے تو رہ رہ کر پچھتاؤ گے

سایہ سایہ ملنے سے تو نہ ملنا ہی بہتر ہے

جسموں کی اس آگ سے آ کر کب تک آنکھ چراؤ گے

وہم و گماں کی اس بستی میں بہتر ہے خاموش رہو

جتنے منہ اتنی ہی باتیں کس کس کو سمجھاؤ گے

رنگوں کی اس بھیڑ میں تم کو بھایا ہے کیوں ایک ہی رنگ

بھید یہ اپنے دل کا کیسے اوروں کو بتلاؤ گے