بہار آئی ہے ہم کو کیا کہے گا باغباں دیکھیں

چمن میں رہنے پاوے گا ہمارا آشیاں دیکھیں

اٹھا اس منہ سے اے بادِ صبا گھونگٹ کے آنچل کو

توجہ سے تری ہم بھی ٹک اک یہ گلستاں دیکھیں

ہر اک نے راہ میں اس کی کیا ہے چشم کو گریاں

کرے کس آبِ جو پر رحم وہ سروِ رواں دیکھیں

پکاریں ان کو آؤ اپنے باغوں کی خبر پوچھیں

اسی گلشن سے آتی ہیں چلی یہ بلبلاں دیکھیں

یقیںؔ کے سر کو ٹھکرا کر بتاں آپس میں کہتے ہیں

جئے گا کب تک ان طرحوں سے ایسا ناتواں دیکھیں