حمدنعتغزلنظمقطعاتترانےمناجاتبزم مزاحگیتادب اطفالرباعیآزاد نظم
فہرست ردیف
منتخب کلام کی ردیف کے آخری حرف کی ترتیب پر فہرست

ذرّہ ذرّہ پہ ہے احسانِ رسولِ عربیؐ

نعت| دلؔ ایوبی انتخاب| بزم سخن

ذرّہ ذرّہ پہ ہے احسانِ رسولِ عربیؐ
اے خوشا مہرِ درخشانِ رسولِ عربیؐ
ہیں دل و جان سے قربانِ رسولِ عربیؐ
اے زہے شانِ فدایانِ رسولِ عربیؐ
کیوں نہ ہوں دل سے ثنا خوانِ رسولِ عربیؐ
ہم بھی ہیں بلبلِ بستانِ رسولِ عربیؐ
اس کی تقدیر کے قرباں ہے میسر جس کو
سایۂ گوشۂ دامانِ رسولِ عربیؐ
مرتبہ ان کے غلاموں کا کوئی کیا سمجھے
ہے سوا شاہ سے دربانِ رسولِ عربیؐ
مہر و مہ ، انجم و افلاک و ملک ، جنّ و بشر
ہیں سبھی تابعِ فرمانِ رسولِ عربیؐ
آنکھ اٹھاتے نہیں میخانۂ ہستی کی طرف
کتنے خود دار ہیں مستانِ رسولِ عربیؐ
حق کو پہچانے تو پہچان سکے ان کو کوئی
ورنہ ممکن نہیں عرفانِ رسولِ عربیؐ
اے دلؔ اللہ نے چاہا تو مدینے جا کر
ہم بھی ہوں گے کبھی مہمانِ رسولِ عربیؐ

پچھلا کلام | اگلا کلام

شاعر کا مزید کلام