کٹھن حالات میں اپنے ارادوں کو جواں رکھنا

ہمیں آتا ہے دل میں شعلۂ غم کو نہاں رکھنا

اکیلے گھر میں کیسے وقت کاٹو گے تنِ تنہا

کوئی تصویر لٹکا کر سرِ دیوارِ جاں رکھنا

ہماری فکر تم چھوڑو ہمیں یہ کام آتا ہے

اندھیروں میں بسر کرنا نظر میں کہکشاں رکھنا

اجل اور زندگی کی دوستی اک حرفِ باطل ہے

بہت دشوار ہے پانی پہ بنیادِ مکاں رکھنا

چمن پر ایک دن فصلِ خزاں کا راج بھی ہوگا

عبث ہے دل میں ارمانِ بہارِ جاوداں رکھنا

نہ جانے اِس میں پوشیدہ ہیں اس کی حکمتیں کیا کیا

ہمیشہ گردشوں میں یہ زمین و آسماں رکھنا

کہاں آسان ہے اہلِ سخن کی بھیڑ میں شاہدؔ

جدا اوروں سے اپنا طرزِ گفتار و بیاں رکھنا