طلب تو جزوِِ تمنا کبھی رہی بھی نہیں

سو اب کسی کے نہ ہونے سے کچھ کمی بھی نہیں

ہمیں تمہاری طرف روز کھینچ لاتی تھی

وہ ایک بات جو تم نے کبھی کہی بھی نہیں

وہ سب خیال کے موسم کسی نگاہ سے تھے

سو اب خوشی بھی نہیں دل گرفتگی بھی نہیں

کرم کیا کہ رکے تم نگاہ بھر کے لئے

نظر کو اس سے زیادہ کی تاب تھی بھی نہیں

وہ ایک پل ہی سہی جس میں تم میسّر ہو

اُس ایک پل سے زیادہ تو زندگی بھی نہیں

کسی کی سمت کچھ ایسے بڑھی تھی چشمِ طلب

صدائے دل پہ پلٹتی تو کیا رکی بھی نہیں

یہ جانتے تو مزاج آشنا ہی کیوں ہوتے

جو روز تھا وہ سخن اب کبھی کبھی بھی نہیں

سنا رہے ہو ہمیں کس نگاہِ ناز کے غم

ہم اُس کے سامنے ہوتے تو پوچھتی بھی نہیں

ہزار تلخ مراسم سہی پہ ہجر کی بات

اُسے پسند نہ تھی اور ہم نے کی بھی نہیں