اترتا ہے جو آنکھوں سے تمہارےغم کا پیراہن

سحر کو گل پہنتے ہیں اسی شبنم کا پیراہن

زیادہ سے زیادہ خوبصورت اس کا پیکر ہے

لگے ہے بیش قیمت اس پہ کم سے کم کا پیراہن

مری سانسوں سے چلتا ہے نظامِ رنگ و بو تیرا

مرے دم سے مہکتا ہے ترے عالم کا پیراہن

برہنہ سرخیوں کو دیکھ کر ہر صبح کاغذ پر

پہن لیتی ہے بینائی مری ماتم کا پیراہن

فرازؔ اب تم بھی آئینہ کے چہرے پر نظر ڈالو

بدلنے کو ہے شاخیں بھی نئے موسم کا پیراہن