رنج دے کے آخر کیوں مسکرا نہیں دیتے

تم سزا تو دیتے ہو حوصلہ نہیں دیتے

منزلیں تو خود اپنے عزم ہی سے ملتی ہیں

رہنما مسافر کو راستہ نہیں دیتے

اس کو موج ساحل پر خود ہی چھوڑ جاتی ہے

جس کو کشتیوں والے آسرا نہیں دیتے

کیا غضب کیا تم نے کم سنوں کے ہاتھوں میں

دل تو دل ہے پھر آخر آئینہ نہیں دیتے

آج تک نہ جانے کس کشمکش میں ہیں منصف

بحث روز سنتے ہیں فیصلہ نہیں دیتے

موسموں کی سازش سے پیڑ پھل تو دیتے ہیں

نفرتوں کے پھل لیکن ذائقہ نہیں دیتے