جنوں نے دشت بدلا رنگِ اربابِ چمن بدلے

نگاہیں تم نے بدلیں میں نے اندازِ سخن بدلے

کسی کے ہاتھ زخمی ہیں نہ پیراہن دریدہ ہے

طریقِ یوسفی بدلا زلیخائی کے فن بدلے

حقیقت سے فسانے تک فسانے سے نگاہوں تک

مرے پاس آتے آتے اُس نے کتنے پیرہن بدلے

غلط فہمی تری نظروں نے پھیلائی ہے محفل میں

ہوس کو ہوش آئے گر تری نظروں کا فن بدلے

وہ آئیں تو کہاں آئیں لکھیں خط تو کہاں لکھیں

خدا ہی جانے میں نے کتنے گھر کتنے وطن بدلے

تری بزمِ طرب قائم رہی بھی تو سحر تک ہے

تری بزمِ طرب سے کون یہ رنج و محن بدلے

جدھر دیکھو اُدھر اہلِ ہوس کا بول بالا ہے

خدا ہی ہے جو میکشؔ انجمن کی انجمن بدلے