ہوا کے ساتھ پرندوں کے پر نہیں آتے

لہو کی لہر تو آتی ہے سر نہیں آتے

خیالِ یار کی آوارگی عجب شے ہے

گھروں کو لوٹ کے ہم رات بھر نہیں آتے

تو آسماں کا ستارہ ہے میں زمیں کا دھواں

تری نظر میں میرے بام و در نہیں آتے

تمام شہر ہے مردہ میری طرح لیکن

کسی بھی چہرے پہ کتبے نظر نہیں آتے

ہمارے ساتھ چلے ہو تو سوچ لو پہلے

یہ راہ وہ ہے کہ جس میں شجر نہیں آتے

مرا بدن بھی کوئی گہری جھیل ہے فاضلؔ

کہ زخم لاکھ ہیں لیکن نظر نہیں آتے