کچھ دن اگر یہی رہا دیوار و در کا رنگ

دیوار و در پہ دیکھنا خونِ جگر کا رنگ

بھولا نہیں ہوں مقتلِ امید کا سماں

تحلیل ہو رہا تھا شفق میں سحر کا رنگ

دنیا غریقِ شعبدۂ جامِ جم ہوئی

دیکھے گا کون خونِ دلِ کوزہ گر کا رنگ

الجھے ہوئے دھویں کی فضا میں ہے اک لکیر

کیا پوچھتے ہو شمعِ سرِ رہ گزر کا رنگ

دامانِ فصلِ گل پہ خزاں کی لگی ہے چھاپ

ذوقِ نظر پہ بار ہے برگ و ثمر کا رنگ

جمنے لگی شکیبؔ جو پلکوں پہ گردِ شب

آنکھوں میں پھلینے لگا خوابِ سحر کا رنگ