داغ سے مہکی ہوئی زخموں سے لالہ پیرہن

کس قدر ملتی ہے شاخِ درد سے شاخِ چمن

فرشِ گل ، مینائے مے ، شمعِ سحر ، سازِ سخن

سب اٹھے لے لیکن نہ اٹھا میں خرابِ انجمن

مژدہ اے یارانِ تشنہ دل سے پھوٹا پھر لہو

اے شبِ تارِ عزیزاں پھر جلا داغِ کہن

ساز میں یہ شورشِ غم لائے مطرب کس طرح

اس کی دھن پابند نے نغمہ ہمارا نے شکن

دیکھیے کب تک بلائے جاں رہے ایک حرفِ شوق

دل حریصِ گفتگو اور چشمِ خوباں کم سخن

سچ تو ہے مجروؔح نے اس گل سے کچھ پیماں لیے

یہ خبر لیکن کہاں سے لے اڑا مرغِ چمن