ہم بندۂ حسن و عشق سہی ایسا بھی کوئی وقت آتا ہے

جب حسن سے دقت ہوتی ہے جب عشق سے جی گھبراتا ہے

آنکھوں کے سفینے ہیچ سہی کچھ گوہر ڈھونڈ ہی لائے ہیں

غم مایۂ یک عالم ہے مگر پہلو میں سمٹ ہی آتا ہے

وہ رس تو ہوائیں پی بھی گئیں وہ رنگ تو کرنیں چاٹ گئیں

وہ شکل کہاں چھپ جاتی ہے وہ روپ کہاں کھو جاتا ہے

پوچھیں جو کوئی غمخوار ملے سمجھیں جو کوئی بیمار ملے

ہم جس کو غمِ دل کہتے ہیں اُس دیس میں کیا کہلاتا ہے

ساحل پہ جو ایک تحریر سی ہے اس گیت کی ایک تصویر سہی

جو گیت کہ دل موجوں سے کبھی آواز ملا کر گاتا ہے