حمدنعتغزلنظمقطعاتترانےمناجاتبزم مزاحگیتادب اطفالرباعیآزاد نظم
فہرست ردیف
منتخب کلام کی ردیف کے آخری حرف کی ترتیب پر فہرست

چمن ہے مقتلِ نغمہ اب اور کیا کہیے

غزل| مجروحؔ سلطان پوری انتخاب| بزم سخن

چمن ہے مقتلِ نغمہ اب اور کیا کہیے
بس اک سکوت کا عالم جسے نوا کہیے
اسیرِ بندِ زمانہ ہوں صاحبانِ چمن
مری طرف سے گلوں کو بہت دعا کہیے
یہی ہے جی میں کہ وہ رفتۂ تغافل و ناز
کہیں ملے تو وہی قصّۂ وفا کہیے
اُسے بھی کیوں نہ پھر اپنے دلِ زبوں کی طرح
خرابِ کاکل و آوارۂ ادا کہیے
یہ کوئے یار یہ زنداں یہ فرشِ میخانہ
انہیں ہم اہلِ تمنا کے نقشِ پا کہیے
وہ ایک بات ہے کہیے طلوعِ صبحِ نشاط
کہ تابشِ بدن و شعلۂ حنا کہیے
وہ ایک حرف ہے کہیے اُسے حکایتِ زلف
کہ شکوۂ رسن و بندشِ بلا کہیے
رہے نہ آنکھ تو کیوں دیکھئے ستم کی طرف
کٹے زبان تو کیوں حرفِ ناروا کہیے
پکارئیے کفِ قاتل کو اب معالجِ دل
بڑھے جو ناخنِ خنجر گرہ کشا کہیے
پڑے جو سنگ تو کہیے اسے نوالۂ زر
لگے جو زخم بدن پر اسے قبا کہیے

فسانہ جبر کا یاروں کی طرح کیوں مجروحؔ
مزہ تو جب ہے کہ جو کہیے برملا کہیے

پچھلا کلام | اگلا کلام

شاعر کا مزید کلام