وہ پہلا سا سماں اگلی سی وہ باتیں کہاں ساقی

زمیں ہم سے پھری بدلا ہے یکسر آسماں ساقی

وہ دورِ میکشی وہ جام وہ بادہ کہاں ساقی

کہ رندانِ قدح کش آج ہیں فاقہ کناں ساقی

ہمیں کیا گردشِ دوراں مٹائے گی زمانے سے

ہمارا تذکرہ ہے داستاں در داستاں ساقی

بزعمِ جہل اسے راحت کدہ سمجھے ہیں دیوانے

یہ دنیا در حقیقت ایک ہے خوابِ گراں ساقی

نشانِ راہِ منزل رہ گیا چپ کر غباروں میں

زمیں سے تا فلک اڑتی ہے گردِ کارواں ساقی

نظامِ میکدہ برہم کیا دورِ زمانہ نے

نہ وہ میخوار ہیں باقی نہ وہ پیرِ مغاں ساقی

یہ کیسا سرخ جوڑا مادرِ گیتی نے بدلا ہے

فضائے دہر سرتا سر ہوئی ہے خوں فشاں ساقی

جہاں میخانۂ ہستی کے رہبر راہ زن نکلیں

سلامت کیوں بھلا منزل پہ پہنچے کارواں ساقی

قمرؔ کیا کوئی بھی مقصد کو اپنے پا نہیں سکتا

مخالف جس کے ہو جائیں زمین و آسماں ساقی