تیر کھانے کی ہوس ہے تو جگر پیدا کر

سرفروشی کی تمنا ہے تو سر پیدا کر

کوہکن! کوہکنی شیوۂ عشاق نہیں

ہے جو عاشق دلِ معشوق میں گھر پیدا کر

کون سی جا ہے جہاں جلوۂ معشوق نہیں

شوقِ دیدار اگر ہے تو نظر پیدا کر

مرے ہی دل پہ گرے کاش یہ بجلی بن کر

ائے فلک! آہ میں اتنا ہی اثر پیدا کر

اپنی گردش پہ بہت ہے تجھے ائے چرخ گھمنڈ

جب میں جانوں کہ شبِ غم کی سحر پیدا کر

صدمے اُلفت کے اُٹھانے ہیں الہی! مشکل

دل اگر ایک دیا لاکھ جگر پیدا کر

عشق بازی کا اگر حوصلہ رکھتا ہے امیؔر

دل جو لوہے کا تو پتھر کا جگر پیدا کر