رہِ وفا میں مراحل تو بے شمار آئے

وفا شعار مگر پھر بھی کام گار آئے

کوئی نہ کام زمانے میں کیجئے ایسا

یقیں دلوں کو نہ آنکھوں کو اعتبار آئے

جنھیں خبر تھی شہادت کا مرتبہ کیا ہے

فضائے صحن حرم سے وہ سوئے دار آئے

کہاں کہاں دلِ بیتاب لے گیا ان کو

کہاں کہاں ترے شیدا تجھے پکار آئے

فضول اب نہ کرو ذکرِ قیصر و فغفور

نہ جانے کتنے یہاں ایسے تاج دار آئے

وہ روز و شب ہمیں یاد آ رہے ہیں روز و شب

جو روز و شب کہ مدینے میں ہم گزار آئے

فسردہ کلیاں ہوں گل زرد سرنگوں غنچے

چمن میں ایسی نہ یا رب کبھی بہار آئے

ہے جس کے سامنے روزِ حساب کا منظر

مرے کریم اسے کس طرح قرار آئے

جو زندگی میں بٹھاتے تھے اپنی آنکھوں پر

وہ بعدِ مرگ لحد میں ہمیں اتار آئے

تھے غم تو کوئی بھی دنیا میں غم گسار نہ تھا

رہا نہ غم کوئی جس دم تو غم گسار آئے

فضائے گلشن عالم ہے غم فزا عاجزؔ

جو آئے گلشنِ عالم میں اشک بار آئے