حمدنعتغزلنظمقطعاتترانےمناجاتبزم مزاحگیت
فہرست ردیف
منتخب کلام کی ردیف کے آخری حرف کی ترتیب پر فہرست

پڑتی ہے آ کے جان پر آخر بلائے دل

غزل| رندؔ لکھنوی انتخاب| بزم سخن

پڑتی ہے آ کے جان پر آخر بلائے دل
یا رب کسی بشر کا کسی پر نہ آئے دل
تیرے بغیر کس کی تمنا کرے بشر
تو آرزوئے جان ہے تو مدعائے دل
جو کچھ سلوک تو نے کیے اس غریب سے
کیوں بے وفا بتا تو یہی تھی جزائے دل
تاب و توان و صبر و خرد کب کے چل دیے
رکھتے ہیں کائنات میں ہم کیا سوائے دل
گاڑا فلک نے پھر کسی عاشق کو خاک میں
مرقد سے آ رہی ہے صدا ہائے ہائے دل
ایسا کہاں انیس کہاں ایسا غم گسار
بیگانہ سب سے ہے جو ہوا آشنائے دل
غفراں پناہ جب سے لہو ہو کے بہہ گیا
سینے میں آ کے درد رہا ہے بجائے دل
چھوڑا اگر اجل نے وفا زیست نے بھی کی
او بے وفا دکھاؤں گا تجھ کو وفائے دل
افسردگی نے کر دیا اس درجہ مضمحل
آتی نہیں ہے سینے سے باہر صدائے دل
آ عندلیب مل کے کریں آہ و زاریاں
تو ہائے گل پکار میں چلاؤں ہائے دل
قربان ہے وہ تجھ پہ تصدق ہوں اس پہ میں
دل تجھ پہ ہے نثار تو میں ہوں فدائے دل
غم کا گزر ہے اس میں نہ غصے کا دخل ہے
سنسان مدتوں سے ہے ماتم سرائے دل
اشکوں کے ساتھ وہ بھی لہو ہو کے بہہ گیا
اے رندؔ دیکھ لو یہ ہوئی انتہائے دل

پچھلا کلام | اگلا کلام

شاعر کا مزید کلام